കണ്ണ്

സമയവും കാലവുമളക്കാതെയുള്ള

എന്റെ കണ്ണുകളിലേക്കുള്ള  നിന്റെ യാത്ര.

ഇന്നുമവിടെ താഴ്വേരുകൾ പൊട്ടിയ 

ഉണക്കമരച്ചോടുകളുണ്ട്,

ചിരിക്കാത്ത പക്ഷികളുണ്ട് 

ചിതറിയ  ഒരാകാശമുണ്ട്‌ .

എന്റെ  കണ്ണിന്റെ പാറയിൽ 

തട്ടി  വീഴുന്ന നിന്റെ മൂകത 

ഒരു കടലായ്  

ഇന്നും താഴേക്കു തന്നെ,

എന്റെ പച്ച ഞരമ്പുകളിലേക്ക് .

ഇന്നീ കണ്ണിന്റെ തിരപ്പെരുക്കത്തിൽ 

മുങ്ങി നിവരുന്ന ഓർമ്മസന്ധ്യകൾ 

ഒരു  പുകമറയിലെന്ന പോൽ 

നീലിച്ചും നരച്ചും 

മണ്ണിനാഴങ്ങളിലേക്ക് ...

എന്നും  

നെഞ്ചിനുള്ളിലമരുന്നു

ഒരു പിടി വിത്തുകൾ,

കാറ്റാടികൾ

നിന്റെ കൈവിരലുകൾ 

തരുന്ന തലോടലുകൾ .